ᱪᱮᱫᱟᱜ
ᱥᱮᱢᱪᱚᱨᱚᱱ ᱦᱮᱢᱵᱨᱚᱢ
ᱥᱮᱨᱢᱟ ᱢᱟ ᱪᱚᱴ ᱨᱮ ᱥᱟ.ᱨᱤ ᱦᱳ
ᱨᱤᱢᱤᱞ ᱢᱟ ᱦᱩᱰᱩᱨᱚᱜ ᱠᱟᱱ᱾
ᱯᱩᱠᱷᱨᱤ ᱢᱟ ᱜᱷᱟᱴ ᱨᱮ ᱥᱟᱨᱤ ᱦᱳ
ᱨᱚᱴᱮ ᱢᱟᱢ ᱨᱟᱨᱟᱜ ᱠᱟᱱ
ᱨᱟᱜ ᱛᱮᱢ ᱦᱚᱢᱚᱨᱚᱜ ᱠᱟᱱ ᱪᱮᱫᱟᱜ ᱦᱳ
ᱫᱟᱜ ᱢᱟ ᱫᱟᱨᱟᱭ ᱛᱮ᱾
ᱟᱛᱳ ᱢᱟ ᱰᱤᱦᱤ ᱨᱮ ᱥᱟ.ᱨᱤ ᱦᱳ
ᱥᱟᱠᱣᱟ ᱢᱟ ᱥᱟᱰᱮ ᱠᱟᱱ
ᱵᱤᱨ ᱢᱟ ᱵᱩᱨᱩ ᱨᱮ ᱥᱟ.ᱨᱤ ᱦᱳ
ᱡᱤᱞ ᱢᱟᱢ ᱧᱤᱧᱤᱨ ᱠᱟᱱ
ᱧᱤᱨ ᱛᱮᱢ ᱫᱟ. ᱫᱟ.ᱲ ᱠᱟᱱ ᱪᱮᱫᱟᱜ ᱦᱳ
ᱥᱮᱸᱫᱽᱨᱟ ᱠᱚ ᱫᱟᱨᱟᱭ ᱛᱮ᱾
ᱟᱠᱷᱲᱟ ᱢᱟ ᱥᱟᱥᱲᱟ ᱨᱮ ᱥᱟ.ᱨᱤ ᱦᱳ
ᱢᱟᱪᱮᱫ ᱢᱟᱢ ᱪᱮᱪᱮᱫ ᱠᱟᱱ
ᱯᱟ.ᱴᱷᱩᱣᱟ. ᱢᱟ ᱜᱤᱫᱽᱨᱟ. ᱨᱮ ᱥᱟ.ᱨᱤ ᱦᱳ
ᱥᱮᱪᱮᱫ ᱢᱟᱢ ᱪᱮᱪᱮᱫ ᱠᱟᱱ
ᱪᱮᱪᱮᱫ ᱛᱮᱢ ᱞᱮᱫ ᱪᱮᱪᱮᱫ ᱠᱟᱱ ᱪᱮᱫᱟᱜ ᱦᱳ
ᱟ.ᱠᱤᱞ ᱜᱮᱭᱟᱱ ᱟᱨᱡᱟᱣ ᱛᱮ᱾
ᱟᱠᱷᱲᱟ ᱢᱟ ᱵᱩᱴᱟ.ᱨᱮ ᱥᱟ.ᱨᱤ ᱦᱳ
ᱴᱟᱢᱟᱠ ᱢᱟ ᱥᱟᱰᱮ ᱠᱟᱱ
ᱢᱟᱹᱫᱟᱹᱲᱤᱭᱟ. ᱢᱟ ᱱᱟᱪᱚᱱᱤᱭᱟ. ᱨᱮ ᱥᱟ.ᱨᱤ ᱦᱳ
ᱮᱱᱮᱪ ᱢᱟᱢ ᱥᱮᱨᱮᱧ ᱠᱟᱱ
ᱥᱮᱨᱮᱧ ᱛᱮᱢ ᱮᱱᱮᱪ ᱠᱟᱱ ᱪᱮᱫᱟᱜ ᱦᱳ
ᱨᱟ.ᱥᱠᱟ ᱢᱟ ᱢᱮᱴᱟᱣ ᱛᱮ᱾
--------------------------------
ᱚᱱᱚᱬᱦᱮ ᱩᱯᱨᱩᱢ ᱺ ᱢᱟᱱᱚᱛᱟᱱ ᱚᱱᱚᱬᱦᱤᱭᱟ. ᱥᱮᱢᱪᱚᱨᱚᱱ ᱜᱚᱢᱠᱮᱭᱟᱜ ᱚᱞ “ᱪᱮᱫᱟᱜ” ᱚᱱᱚᱬᱦᱮ ᱫᱚ “ᱥᱟᱭ ᱥᱮᱨᱢᱟ” ᱨᱮᱭᱟᱜ ᱚᱱᱚᱬᱦᱮ ᱯᱩᱛᱷᱤ ᱨᱮ ᱥᱮᱞᱮᱫ ᱢᱮᱱᱟᱜ ᱟᱠᱟᱫᱟ᱾ ᱟᱨ ᱱᱚᱣᱟ ᱚᱱᱚᱬᱦᱮ ᱛᱟᱞᱟ ᱛᱮ ᱚᱱᱚᱬᱦᱤᱭᱟ. ᱜᱚᱢᱠᱮ ᱥᱟᱱᱟᱢ ᱜᱷᱚᱴᱚᱱ ᱨᱮᱭᱟᱜ ᱜᱮ ᱢᱤᱫ ᱴᱟᱝ ᱚᱡᱮ ᱛᱟᱦᱮ ᱨᱮᱱᱟᱜ ᱠᱟᱛᱷᱟᱭ ᱞᱮᱭ ᱥᱚᱫᱚᱨ ᱟᱠᱟᱫ ᱵᱚᱱᱟ᱾
ᱥᱟᱨ ᱠᱟᱛᱷᱟ ᱺ ᱱᱚᱣᱟ ᱡᱮᱸᱜᱮᱫ ᱨᱮ ᱡᱟᱦᱟᱱᱟᱜ ᱜᱷᱚᱴᱚᱱ ᱠᱚᱜᱮ ᱜᱷᱚᱴᱟᱜ-ᱟ , ᱚᱱᱟ ᱥᱟᱱᱟᱢ ᱠᱚ ᱨᱮᱭᱟᱜ ᱜᱮ ᱢᱤᱫ ᱴᱟᱝ ᱚᱡᱮ ᱫᱚ ᱛᱟᱦᱮᱱ ᱜᱮᱭᱟ᱾ ᱟᱨ ᱚᱱᱟ ᱠᱟᱛᱷᱟ ᱨᱮᱭᱟᱜ ᱜᱮ ᱢᱤᱫ ᱫᱟᱜ.ᱭᱠᱟ. ᱞᱮᱠᱟᱛᱮ ᱢᱟᱱᱚᱛᱟᱱ ᱥᱮᱢᱪᱚᱨᱚᱱ ᱦᱮᱢᱵᱨᱚᱢ ᱜᱚᱢᱠᱮ ᱟᱡᱟᱜ ᱚᱞ “ᱪᱮᱫᱟᱜ” ᱚᱱᱚᱬᱦᱮ ᱛᱟᱞᱟ ᱛᱮ ᱟ.ᱰᱤ ᱴᱷᱤᱠᱼᱮ ᱜᱟᱞᱟᱝ ᱥᱚᱫᱚᱨ ᱟᱠᱟᱫᱟ᱾
ᱚᱱᱚᱬᱦᱮ ᱨᱮᱭᱟᱜ ᱯᱩᱭᱞᱩ ᱛᱷᱚᱠ ᱨᱮ ᱢᱚᱱᱚᱛᱟᱱ ᱚᱱᱚᱬᱦᱤᱭᱟ. ᱜᱚᱢᱠᱮᱭ ᱞᱮᱭ ᱟᱠᱟᱫᱟ, “ᱥᱮᱨᱢᱟ ᱢᱟ ᱪᱚᱴ ᱨᱮ ᱥᱟ.ᱨᱤ ᱦᱳ, ᱨᱤᱢᱤᱞ ᱢᱟ ᱦᱩᱰᱩᱨᱚᱜ ᱠᱟᱱ, ᱯᱩᱠᱷᱨᱤ ᱢᱟ ᱜᱷᱟᱴ ᱨᱮ ᱥᱟ.ᱨᱤ ᱦᱳ, ᱨᱚᱴᱮ ᱢᱟᱢ ᱨᱟᱨᱟᱜ ᱠᱟᱱ,ᱨᱟᱜ ᱛᱮᱢ ᱦᱚᱢᱚᱨᱚᱜ ᱠᱟᱱ ᱪᱮᱫᱟᱜ ᱦᱳ, ᱫᱟᱜ ᱢᱟ ᱫᱟᱨᱟᱭ ᱛᱮ᱾” ᱢᱮᱱ ᱫᱚ ᱥᱮᱨᱢᱟ ᱨᱮ ᱨᱤᱢᱤᱞ ᱦᱩᱲᱩ ᱦᱩᱲᱟ.ᱜ ᱠᱟᱱᱟ ᱚᱱᱟ ᱟᱡᱚᱢ ᱛᱮ ᱯᱩᱠᱷᱨᱤ ᱨᱮ ᱨᱚᱴᱮ ᱠᱚ ᱨᱟᱜ ᱮᱫᱟ, ᱚᱱᱟ ᱨᱟᱜ ᱟᱡᱚᱢ ᱛᱮ ᱢᱟᱱᱚᱛᱟᱱ ᱚᱱᱚᱬᱦᱤᱭᱟ. ᱜᱚᱢᱠᱮᱭᱟᱜ ᱢᱚᱱᱮ ᱨᱮ ᱱᱚᱣᱟ ᱠᱩᱠᱞᱤ ᱦᱤᱡᱩᱜ ᱠᱟᱱᱟ, ᱢᱟᱥᱮ ᱨᱚᱴᱮ ᱫᱚ ᱪᱟᱜ ᱠᱚ ᱨᱟᱨᱟᱜ ᱠᱟᱱᱟ? ᱱᱤᱦᱟ.ᱛ ᱨᱚᱴᱮ ᱫᱚ ᱯᱟᱞᱮᱱ ᱨᱤᱢᱤᱞ ᱨᱮᱭᱟᱜ ᱦᱩᱲᱩ ᱦᱩᱲᱟ.ᱣ ᱟᱡᱚᱢ ᱠᱟᱛᱮᱜ ᱜᱮ ᱠᱚ ᱨᱟᱜ ᱮᱫᱟ᱾ ᱢᱮᱱ ᱫᱚ ᱨᱤᱢᱤᱞ ᱢᱟ.ᱲᱤ ᱠᱚ ᱫᱟᱨᱟᱢ ᱮᱫᱟ᱾ ᱚᱱᱟ ᱞᱮᱠᱟ ᱢᱩᱪᱟ.ᱫ ᱞᱟᱭᱤᱱ ᱨᱮ ᱢᱮᱱ ᱦᱚᱭ ᱢᱮᱱ ᱟᱠᱟ ᱫᱟ “ᱫᱟᱜ ᱢᱟ ᱫᱟᱨᱟᱭ ᱛᱮ”᱾
ᱚᱱᱟᱠᱟ ᱜᱮ ᱫᱚᱥᱟᱨ ᱛᱷᱚᱠ ᱨᱮᱭ ᱪᱟᱨᱦᱮ ᱟᱠᱟᱫᱟ “ᱟᱛᱳ ᱢᱟ ᱰᱤᱦᱤ ᱨᱮ ᱥᱟ.ᱨᱤ ᱦᱳ,ᱥᱟᱠᱣᱟ ᱢᱟ ᱥᱟᱰᱮ ᱠᱟᱱ, ᱵᱤᱨ ᱢᱟ ᱵᱩᱨᱩ ᱨᱮ ᱥᱟ.ᱨᱤ ᱦᱳ, ᱡᱤᱞ ᱢᱟᱢ ᱧᱤᱧᱤᱨ ᱠᱟᱱ, ᱧᱤᱨ ᱛᱮᱢ ᱫᱟ. ᱫᱟ.ᱲ ᱠᱟᱱ ᱪᱮᱫᱟᱜ ᱦᱳ, ᱥᱮᱸᱫᱽᱨᱟ ᱠᱚ ᱫᱟᱨᱟᱭ ᱛᱮ᱾” ᱱᱚᱣᱟ ᱛᱷᱟᱨ ᱛᱟᱞᱟ ᱛᱮ ᱵᱩᱡᱷᱟ.ᱣ ᱧᱟᱢᱚᱜ ᱠᱟᱱᱟ ᱢᱤᱫ ᱟᱛᱳ ᱰᱤᱦᱤ ᱨᱮ ᱥᱮᱸᱫᱽᱨᱟ ᱠᱚ ᱚᱸᱰᱚᱠᱚᱜ ᱞᱟ.ᱜᱤᱫ ᱛᱮ ᱥᱟᱠᱣᱟ ᱠᱚ ᱚᱨᱚᱝ ᱮᱫᱟ, ᱟᱨ ᱚᱱᱟ ᱥᱟᱠᱣᱟ ᱨᱮᱭᱟᱜ ᱥᱟᱰᱮ ᱟᱡᱚᱢ ᱠᱟᱛᱮᱜ ᱵᱤᱨ-ᱵᱩᱨᱩ ᱨᱮᱱ ᱡᱤᱱᱛᱤᱼᱯᱤᱯᱲᱤ ᱠᱚ, ᱥᱟ.ᱞ ᱥᱟᱨᱟᱢ ᱠᱚ ᱵᱚᱛᱚᱨ ᱛᱮ ᱦᱟ.ᱱᱛᱮ ᱱᱟᱷᱛᱮ ᱠᱚ ᱧᱤᱨ ᱡᱚᱝ ᱠᱟᱱᱟ᱾ ᱟᱨ ᱱᱚᱝᱠᱟ ᱫᱟ. ᱫᱟ.ᱲ ᱟᱛᱮᱜ ᱧᱤᱨ ᱨᱮᱭᱟᱜ ᱫᱚ ᱢᱤᱫ ᱴᱟᱝ ᱜᱮ ᱚᱡᱮ, ᱚᱱᱟ ᱫᱚ ᱵᱤᱨ-ᱵᱩᱨᱩ ᱛᱮ ᱥᱮᱸᱫᱽᱨᱟ ᱠᱚ ᱠᱚ ᱫᱟᱨᱟᱭ ᱠᱟᱱᱟ᱾
ᱚᱱᱟ ᱛᱚᱭᱚᱢ ᱨᱮᱱᱟᱜ ᱛᱷᱟᱨ ᱨᱮ ᱢᱟᱱᱚᱛᱟᱱ ᱜᱚᱢᱠᱮᱭ ᱪᱟᱨᱦᱮ ᱟᱠᱟᱫᱟ, “ᱟᱠᱷᱲᱟ ᱢᱟ ᱥᱟᱥᱲᱟ ᱨᱮ ᱥᱟ.ᱨᱤ ᱦᱳ, ᱢᱟᱪᱮᱫ ᱢᱟᱢ ᱪᱮᱪᱮᱫ ᱠᱟᱱ, ᱯᱟ.ᱴᱣᱟ. ᱢᱟ ᱜᱤᱫᱽᱨᱟ. ᱨᱮ ᱥᱟ.ᱨᱤ ᱦᱳ, ᱥᱮᱪᱮᱫ ᱢᱟᱢ ᱪᱮᱪᱮᱫ ᱠᱟᱱ, ᱪᱮᱪᱮᱫ ᱛᱮᱢ ᱞᱮᱫ ᱪᱮᱪᱮᱫ ᱠᱟᱱ ᱪᱮᱫᱟᱜ ᱦᱳ, ᱟ.ᱠᱤᱞ ᱜᱮᱭᱟᱱ ᱟᱨᱡᱟᱣ ᱛᱮ᱾” ᱢᱮᱱ ᱱᱚᱣᱟ ᱛᱷᱟᱨ ᱛᱮ ᱞᱮᱭ ᱦᱚᱪᱚ ᱟᱠᱟᱫᱟ, ᱟᱥᱲᱟ ᱨᱮ ᱢᱟᱪᱮᱫ ᱠᱚ ᱟᱪᱮᱫ ᱠᱚᱭ ᱪᱮᱪᱮᱫ ᱮᱫ ᱠᱚᱣᱟ᱾ ᱢᱮᱱ ᱠᱷᱟᱱ ᱜᱤᱫᱽᱨᱟ. ᱩᱢᱮᱨᱟᱱ ᱯᱟᱴᱷᱩᱣᱟ. ᱪᱮᱫ ᱞᱟ.ᱜᱤᱫ ᱮ ᱥᱮᱪᱮᱫ ᱫᱚᱜ-ᱟ ᱥᱮᱭ ᱪᱮᱪᱮᱫᱟ? ᱚᱱᱟ ᱨᱮᱭᱟᱜ ᱜᱮ ᱛᱮᱞᱟ ᱥᱮ ᱚᱡᱮ ᱞᱮᱠᱟᱛᱮᱭ ᱞᱮᱭ ᱟᱠᱟᱫᱟ ᱟ.ᱠᱤᱞ ᱜᱮᱭᱟᱱ ᱟᱨᱡᱟᱣ ᱞᱟ.ᱜᱤᱫ ᱜᱮ ᱯᱟ.ᱴᱣᱟ ᱠᱚᱠᱚ ᱪᱮᱪᱮᱫ ᱠᱟᱱᱟ᱾
ᱯᱩᱱ ᱟᱱᱟᱜ ᱛᱷᱟᱨ ᱨᱮ ᱫᱚ ᱢᱟᱱᱚᱛᱟᱱ ᱜᱚᱝᱠᱮᱭ ᱪᱟᱨᱦᱮ ᱟᱠᱟᱫᱟ “ᱟᱠᱷᱲᱟ ᱢᱟ ᱵᱩᱴᱟ.ᱨᱮ ᱥᱟ.ᱨᱤ ᱦᱳ, ᱴᱟᱢᱟᱠ ᱢᱟ ᱥᱟᱰᱮ ᱠᱟᱱ, ᱢᱟ.ᱫᱟ.ᱲᱤᱭᱟ. ᱢᱟ ᱱᱟᱪᱚᱱᱤᱭᱟ. ᱨᱮ ᱥᱟ.ᱨᱤ ᱦᱳ, ᱮᱱᱮᱪ ᱢᱟᱢ ᱥᱮᱨᱮᱧ ᱠᱟᱱ, ᱥᱮᱨᱮᱧ ᱛᱮᱢ ᱮᱱᱮᱪ ᱠᱟᱱ ᱪᱮᱫᱟᱜ ᱦᱳ, ᱨᱟᱱ.ᱥᱠᱟ. ᱢᱟ ᱢᱮᱴᱟᱣ ᱛᱮ᱾” ᱢᱮᱱ ᱫᱚ ᱡᱚᱦᱚᱜ ᱨᱟᱱ.ᱥᱠᱟ. ᱞᱟ.ᱜᱤᱫ ᱫᱟᱨᱮ ᱵᱩᱴᱟ.ᱨᱮ ᱮᱱᱮᱪ ᱥᱮᱨᱮᱧ ᱟᱠᱷᱲᱟ ᱠᱚ ᱨᱮᱭᱟ ᱨᱟ, ᱩᱱ ᱡᱚᱦᱚᱜ ᱴᱟᱢᱟᱠ ᱥᱟᱰᱮ ᱛᱮ ᱱᱟᱪᱚᱱᱤᱭᱟ. ᱠᱚ ᱥᱮᱨᱮᱧ ᱠᱚ ᱮᱛᱚᱦᱚᱵ ᱜᱚᱫᱟ ᱟᱨ ᱢᱟ.ᱫᱟ.ᱲᱤᱭᱟ. ᱠᱚᱦᱚ ᱚᱱᱟ ᱥᱟᱶ ᱛᱮᱠᱚ ᱢᱟᱛᱣᱟᱨ ᱜᱚᱫᱚᱜ-ᱟ᱾ ᱱᱚᱣᱟ ᱧᱮᱞ ᱛᱮᱦᱚ ᱚᱱᱚᱬᱦᱤᱭᱟ. ᱜᱚᱢᱠᱮ ᱚᱡᱮᱭ ᱯᱟᱸᱡᱟ ᱟᱠᱟᱫᱟ ᱚᱱᱟ ᱛᱮᱭ ᱢᱮᱱ ᱟᱠᱟᱫᱟ “ ᱛᱮᱢ ᱮᱱᱮᱪ ᱠᱟᱱ ᱪᱮᱫᱟᱜ ᱦᱳ” ᱟᱨ ᱚᱱᱟ ᱨᱮᱱᱟᱜ ᱛᱮᱞᱟ ᱞᱮᱠᱟᱛᱮ ᱚᱱᱟ ᱛᱟᱭᱚᱢ ᱨᱮᱭᱟᱜ ᱞᱟ.ᱭᱤᱱ ᱨᱮᱭ ᱢᱮᱱ ᱟᱠᱟᱫᱟ “ᱨᱟ.ᱥᱠᱟ. ᱢᱟ ᱢᱮᱴᱟᱣ ᱛᱮ”᱾ ᱢᱮᱱ ᱫᱚ ᱱᱚᱣᱟ ᱮᱱᱮᱪ ᱥᱮᱨᱮᱧ ᱟᱠᱷᱲᱟ ᱫᱚ ᱢᱚᱱᱮ ᱨᱮᱭᱟᱜ ᱨᱟ.ᱥᱠᱟ. ᱢᱮᱴᱟᱣ ᱞᱟ.ᱜᱤᱫ ᱜᱮ ᱥᱟᱯᱲᱟᱣ ᱟᱠᱟᱱᱟ᱾
ᱠᱷᱟᱴᱚ ᱢᱟᱪᱷᱟᱛᱮ ᱛᱮ ᱞᱮᱭ ᱞᱮᱠᱷᱟᱱ, ᱢᱟᱱᱚᱛᱟᱱ ᱚᱱᱚᱬᱦᱤᱭᱟ. ᱥᱮᱢᱪᱚᱨᱚᱱ ᱦᱮᱢᱵᱨᱚᱢ ᱜᱚᱢᱠᱮᱭᱟᱜ ᱚᱞ “ᱪᱮᱫᱟᱜ” ᱚᱱᱚᱬᱦᱮ ᱫᱚ ᱵᱟᱥᱛᱚᱵ ᱡᱚᱜᱚᱛ ᱨᱮᱭᱟᱜ ᱢᱤᱫ ᱴᱟᱝ ᱪᱤᱛᱟ.ᱨ ᱮ ᱥᱟᱵ ᱨᱟᱠᱟᱵ ᱟᱠᱟᱫᱟ᱾ ᱡᱟᱦᱟ ᱫᱚ ᱦᱩᱭᱩᱜ ᱠᱟᱱᱟ— ᱡᱟᱦᱟᱱ ᱜᱷᱚᱴᱚᱱ ᱜᱮ ᱵᱤᱱ ᱚᱡᱮ ᱛᱮᱫᱚ ᱵᱟᱝ ᱜᱷᱚᱴᱟᱜ-ᱟ᱾ ᱡᱮᱞᱮᱠᱟ ᱚᱱᱚᱬᱦᱮ ᱨᱮᱜᱮ ᱵᱚᱱ ᱧᱮᱞ ᱧᱟᱢ-ᱟ ᱫᱟᱜ ᱡᱟ.ᱲᱤ ᱵᱮᱜᱚᱨ ᱨᱚᱴᱮ ᱵᱟᱝ ᱠᱚ ᱨᱟᱜᱽ ᱟ, ᱥᱤᱠᱟ.ᱨᱤᱭᱟ. ᱵᱚᱛᱚᱨ ᱛᱮᱜᱮ ᱡᱤᱞ ᱫᱚᱭ ᱧᱤᱨᱟ, ᱟ.ᱠᱤᱞ ᱜᱮᱭᱟᱱ ᱟᱨᱡᱟᱣ ᱞᱟ.ᱜᱤᱫ ᱜᱮ ᱯᱟ.ᱴᱣᱟ. ᱜᱤᱫᱽᱨᱟ. ᱠᱚ ᱯᱟᱲᱦᱟᱜ-ᱟ, ᱟᱨ ᱨᱟ.ᱥᱠᱟ. ᱢᱮᱴᱟᱣ ᱞᱟ.ᱜᱤᱫ ᱜᱮ ᱮᱱᱮᱪ ᱥᱮᱨᱮᱧ ᱟᱠᱷᱲᱟ ᱫᱚ ᱛᱮᱭᱟᱨᱚᱜ-ᱟ᱾
---------------------------------------------------------------------------------------------
Nothing