Santali Poem: Aam Ar Inj written by Doman Sahu Samir

 

Santali poem “Aam Ar Ing” was written by Doman Sahu Samir. Which is taken from “Setak” poems book authored by Doman Sahu Samir. If you translate the tittle of poem, then it should be “You And Me”. Which matches to the poem perfectly. In this poem poet describes the difference between him and a rich person. This poem follows the AB AB rhythm style of poems which makes the poem more easy to understand. The poem and it’s substances are given below in Santali.

 

ᱟᱢ ᱟᱨ ᱤᱧ

ᱰᱚᱢᱟᱱ ᱥᱟ.ᱦᱩ‌ ᱥᱚᱢᱤᱨ

 

ᱟᱢ ᱫᱚ ᱠᱤᱥᱟ.ᱲ , ᱟᱢ ᱫᱚ ᱪᱤᱠᱟ.ᱲ

ᱟᱢ ᱫᱚ ᱞᱟ.ᱴᱩ ᱦᱚᱲ,

ᱤᱧ ᱫᱚ ᱨᱮᱸᱜᱮᱡ, ᱤᱧ ᱫᱚ ᱱᱟᱪᱟᱨ

ᱤᱧ ᱫᱚ ᱠᱟᱱ.ᱴᱤᱡ ᱦᱚᱲ᱾

 

ᱟᱢ ᱫᱚ ᱡᱮᱞ, ᱟᱢ ᱫᱚ ᱦᱳᱠᱤ

ᱟᱢ ᱫᱚ ᱛᱚᱣᱟ ᱫᱟᱠᱟ,

ᱤᱧ ᱫᱚ ᱥᱟ.ᱛᱩ ᱵᱮᱜᱚᱨ ᱩᱛᱩ

ᱠᱷᱚᱫᱮᱼᱡᱚᱵᱨᱟ ᱫᱟᱠᱟ᱾

 

ᱟᱢ ᱫᱚ ᱫᱷᱩᱛᱤ, ᱟᱢ ᱫᱚ ᱡᱟᱞᱟ

 ᱯᱟᱱᱟᱦᱤ ᱟᱨ ᱪᱷᱟᱛᱟᱨ,

ᱵᱷᱟᱜᱣᱟ ᱰᱮᱸᱜᱟ ᱤᱧ ᱫᱚ ᱠᱟ.ᱴᱤᱡ

ᱪᱚᱴ ᱥᱮᱨᱢᱟ ᱞᱟᱛᱟᱨ᱾

 

ᱟᱢ ᱫᱚ ᱡᱟᱜᱟ, ᱟᱢ ᱫᱚ ᱡᱩᱢᱤ

ᱟᱢ ᱫᱚ ᱩᱥᱩᱞ ᱚᱲᱟᱜ ,

ᱤᱧ ᱫᱚ ᱡᱷᱟᱵᱟ, ᱤᱧ ᱫᱚ ᱠᱩᱰᱤ

ᱤᱧ ᱫᱚ ᱨᱟ.ᱯᱩᱫ ᱚᱲᱟᱜ᱾

 

ᱟᱢ ᱫᱚ ᱜᱟᱛᱮ, ᱟᱢ ᱫᱚ ᱜᱩᱛᱤ

ᱠᱟ.ᱲᱢᱤ ᱦᱮᱱᱟᱜ ᱠᱚᱛᱟᱢ,

ᱤᱧ ᱫᱚ ᱡᱟᱞᱟ ᱢᱮᱱᱟᱜ ᱛᱤᱧᱟ

ᱮᱨᱟ ᱦᱚᱯᱚᱱ ᱠᱚᱣᱟᱜ᱾

 

ᱟᱢᱟᱜ ᱨᱚᱲ, ᱟᱢᱟᱜ ᱞᱟᱸᱫᱟ

ᱦᱚᱲ ᱠᱚ ᱠᱩᱥᱤᱭᱟᱜ-ᱟ,

ᱤᱧ.ᱜ ᱠᱟᱛᱷᱟ, ᱤᱧᱟ.ᱜ ᱵᱮᱛᱷᱟ

ᱚᱠᱚᱭ ᱞᱩᱛᱩᱨᱟᱜᱼᱟ᱾

 

ᱦᱚᱲᱢᱚ-ᱢᱟᱭᱟᱝ ᱢᱤᱫ ᱜᱛᱟᱞᱟᱝ

ᱢᱤᱫ ᱜᱮᱛᱟᱞᱟᱝ ᱦᱟᱛᱟᱝ,

ᱢᱤᱫ ᱜᱮᱛᱟᱞᱟᱝ ᱨᱮᱸᱜᱮᱡ ᱛᱮᱛᱟᱝ

ᱢᱤᱫ ᱜᱮ ᱥᱮᱛᱳᱝ ᱨᱟᱵᱟᱝ᱾

 

 

 

ᱠᱤᱥᱟᱬ ᱨᱮ ᱦᱚ, ᱨᱮᱸᱜᱮᱡ ᱨᱮ ᱦᱚ

ᱢᱤᱫ ᱜᱮᱭᱟᱞᱟᱝ ᱦᱚᱲ,

ᱦᱚᱲ ᱫᱚ ᱵᱟᱵᱚᱱ ᱯᱮᱴᱮᱡ ᱟᱱᱟ

ᱡᱚᱛᱷᱟᱛ ᱜᱮᱭᱟ ᱨᱚᱲ᱾

 

ᱠᱚᱨᱚᱢ ᱠᱚᱯᱟᱞ ᱡᱩᱫᱤᱢ ᱢᱮᱱᱼᱟ

ᱡᱩᱫᱟ. ᱜᱮᱛᱟ ᱞᱟᱝ,

ᱪᱮᱫ ᱞᱮᱠᱟᱛᱮ ᱚᱱᱟ ᱫᱚᱨᱮ

ᱥᱚᱢᱟᱱ ᱠᱮᱛᱟ ᱞᱟᱝ?

 

ᱢᱤᱫ ᱜᱮᱭᱟ ᱞᱟᱝ ᱛᱤ ᱡᱟᱸᱜᱟ ᱛᱮ

ᱮᱱᱦᱚ ᱵᱷᱮᱜᱟᱨ ᱪᱮᱫᱟᱜ?

ᱚᱠᱚᱭ ᱞᱟ.ᱭᱟ.ᱧ‌ ᱵᱷᱮᱫᱽ ᱠᱟᱛᱷᱟ

ᱠᱚᱯᱟᱞ ᱠᱮᱪᱮᱫ ᱛᱤᱧ ᱪᱮᱫᱟᱜ?

 

 

----------------------------------------------------------------------------------------------------------------------------

ᱚᱱᱚᱬᱦᱮ ᱩᱯᱨᱩᱢ

ᱢᱟᱱᱚᱛᱟᱱ ᱚᱱᱚᱬᱦᱤᱭᱟ. ᱰᱚᱢᱟᱱ ᱥᱟ.ᱦᱩ ᱥᱩᱢᱤᱨ ᱜᱚᱢᱠᱮᱭᱟᱜ ᱚᱞ “ᱟᱢ ᱟᱨ ᱤᱧ” ᱚᱱᱚᱬᱦᱮ ᱫᱚ “ᱥᱮᱛᱟᱜ” ᱚᱱᱚᱬᱦᱮ ᱯᱩᱛᱷᱤ ᱨᱮᱢᱟᱱᱟᱜ ᱟᱠᱟᱫᱟ᱾ ᱱᱚᱣᱟ ᱚᱱᱚᱬᱦᱮ ᱨᱮ ᱚᱱᱚᱬᱦᱤᱭᱟ. ᱫᱚ ᱢᱤᱫ ᱠᱤᱥᱟ.ᱬ ᱦᱚᱲ ᱥᱟᱣ  ᱟᱭᱟᱜ ᱠᱟᱛᱷᱟᱭ ᱛᱩᱠᱟ. ᱡᱚᱠᱷᱟ ᱟᱠᱟᱫᱟ᱾ ᱦᱚᱲᱢᱚ ᱜᱚᱲᱦᱚᱱ ᱛᱮ ᱢᱤᱫ ᱜᱮ ᱨᱮᱦᱚ ᱠᱤᱱ ᱪᱮᱫᱟᱜ ᱟ.ᱠᱤᱱ ᱛᱟᱞᱟ ᱨᱮ ᱱᱩᱱᱟ.ᱜ ᱵᱷᱮᱜᱮᱫ ᱢᱮᱱᱟᱜᱼᱟ ᱪᱮᱫᱟᱜ ᱚᱱᱟ ᱨᱮᱭᱟᱜ ᱜᱮ ᱠᱟᱛᱷᱟ ᱪᱷᱟᱸᱫᱟ ᱛᱮ ᱛᱚᱞ ᱠᱟᱛᱮᱜ ᱚᱱᱚᱬᱦᱮᱭ ᱛᱮᱭᱟᱨ ᱟᱠᱟᱫᱟ᱾

 

ᱥᱟᱨ ᱠᱟᱛᱷᱟ

ᱜᱮᱞ ᱜᱚᱴᱟᱝ ᱛᱷᱟᱨ ᱛᱮ ᱚᱞ ᱟᱠᱟᱱ ᱱᱚᱣᱟ ᱚᱱᱚᱬᱦᱮ ᱨᱮ ᱢᱟᱱᱚᱛᱟᱱ ᱚᱱᱚᱬᱦᱤᱭᱟ. ᱰᱚᱢᱟᱱ ᱥᱟ.ᱦᱩ ᱥᱟᱢᱤᱨ ᱜᱚᱢᱠᱮ ᱟᱡ ᱥᱟᱣ ᱢᱤᱫ ᱠᱤᱥᱟ.ᱬ ᱦᱚᱲᱟᱜ ᱚᱵᱚᱥᱛᱷᱟ ᱨᱮ ᱚᱠᱟ ᱞᱮᱠᱟᱱᱟᱜ ᱵᱷᱮᱫᱽ ᱠᱚ ᱢᱮᱱᱟᱜ ᱟᱠᱟᱫᱟ, ᱚᱱᱟ ᱜᱮᱭ ᱪᱟᱨᱦᱮ ᱟᱠᱟᱫᱟ᱾

 

ᱚᱱᱟᱬᱦᱤᱭᱟ. ᱜᱚᱢᱠᱮᱭ ᱢᱮᱱ ᱟᱠᱟᱫᱟ ᱠᱤᱥᱟ.ᱲ ᱦᱚᱲ ᱫᱚ ᱪᱤᱠᱷᱚᱱ ᱪᱚᱠᱷᱚᱱ ᱥᱟᱶᱛᱟ ᱛᱟᱞᱟ ᱨᱮ ᱢᱟᱨᱟᱝ ᱦᱚᱲ ᱞᱮᱠᱟ ᱠᱚ ᱩᱨᱩᱢᱮᱭᱟ᱾ ᱢᱮᱱ ᱠᱷᱟᱱ ᱟᱡ ᱫᱚ ᱨᱮᱸᱜᱮᱡ ᱱᱟᱪᱟᱨ ᱡᱟᱦᱟᱭ ᱫᱚ ᱥᱟᱶᱛᱟ ᱨᱮ ᱞᱟᱛᱟᱨ ᱜᱟᱛᱟᱜ ᱨᱮᱱ ᱦᱚᱲ ᱥᱮ ᱦᱩᱰᱤᱧ ᱦᱚᱲ ᱠᱚ ᱢᱮᱛᱟ ᱠᱚᱣᱟ᱾ ᱠᱤᱥᱟ.ᱲ ᱦᱚᱲ ᱫᱚ ᱫᱤᱱᱟᱢ ᱜᱮ ᱡᱮᱞ, ᱦᱟᱠᱳ ᱛᱚᱣᱟ ᱫᱟᱠᱟ ᱠᱚ ᱡᱚᱢᱟ, ᱟᱨ ᱟᱡ ᱫᱚ ᱥᱟ.ᱛᱩ ᱵᱮᱜᱚᱨ ᱩᱛᱩ ᱠᱮᱴᱮᱡ ᱡᱚᱵᱨᱟ ᱫᱟᱠᱟᱭ ᱡᱚᱢᱟ᱾

 

ᱠᱤᱥᱟ.ᱲ ᱦᱚᱲ ᱫᱚ ᱫᱷᱩᱛᱤ, ᱡᱟᱞᱟ ᱠᱚᱠᱚ ᱦᱚᱨᱚᱜ ᱵᱟᱸᱫᱮᱭᱟ ᱟᱨ ᱯᱟᱱᱟᱦᱤ ᱟᱛᱮᱜ ᱥᱤᱛᱩᱝ ᱢᱟ.ᱯᱩᱫ ᱪᱷᱟᱛᱟᱨ ᱥᱮ ᱪᱟᱛᱚᱢ ᱩᱢᱩᱞ ᱟᱛᱮᱜ ᱠᱚ ᱫᱟᱲᱟ ᱵᱟᱲᱟᱭᱟ᱾ ᱢᱮᱱ ᱠᱷᱟᱱ ᱟᱡᱟᱜ ᱫᱚ ᱦᱚᱨᱚᱜ ᱨᱮ ᱥᱩᱢᱩᱝ ᱢᱤᱫ ᱵᱷᱟᱜᱣᱟ ᱰᱮᱸᱜᱟ ᱟᱨ ᱛᱟᱦᱮᱱᱟᱭ ᱧᱟᱞᱟᱫ ᱥᱮᱨᱢᱟ ᱞᱟᱛᱟᱨ᱾ ᱠᱤᱥᱟ.ᱲ ᱦᱚᱲᱟᱜ ᱫᱚ ᱡᱚᱢᱤ ᱡᱟᱭᱜᱟ ᱦᱚ ᱢᱮᱱᱟᱜ ᱛᱟᱭᱟ ᱥᱟᱶᱛᱮ ᱩᱥᱩᱞ ᱩᱥᱩᱞ ᱚᱲᱟᱜ ᱠᱚᱛᱟᱭ᱾ ᱢᱮᱱ ᱠᱷᱟᱱ ᱚᱱᱚᱬᱦᱤᱭᱟ. ᱟᱜ ᱫᱚ ᱡᱷᱟᱵᱟ ᱠᱩᱰᱤ ᱢᱮᱱ ᱫᱚ ᱠᱟ.ᱢᱤ  ᱠᱟᱛᱮᱜᱼᱮ ᱟ.ᱥᱩᱞᱚᱜᱼᱟ ᱟᱨ ᱨᱟ.ᱯᱩᱫ ᱚᱲᱟᱜ ᱛᱟᱭ᱾

 

ᱚᱱᱟᱬᱦᱤᱭᱟ. ᱜᱚᱢᱠᱮ ᱟᱨᱦᱚᱭ ᱪᱟᱨᱦᱮ ᱟᱠᱟᱫᱟ ᱠᱤᱥᱟᱲ ᱦᱚᱲ ᱨᱮᱱ ᱫᱚ ᱜᱟᱫᱮᱞ ᱜᱟᱛᱮ ᱠᱚᱦᱚ ᱢᱮᱱᱟᱜ ᱠᱚ ᱛᱟᱭᱟ ᱟᱨ ᱠᱟ.ᱢᱤ ᱡᱚᱝ ᱞᱟ.ᱜᱤᱫ ᱜᱩᱛᱤ ᱠᱟ.ᱲᱢᱤ ᱠᱚ᱾ ᱢᱮᱱ ᱠᱷᱟᱱ ᱟᱡᱟᱜ ᱫᱚ ᱥᱩᱫᱷᱩ ᱡᱟᱞᱟ ᱢᱮᱱᱟᱜ ᱛᱟᱭᱟ ᱟᱨ ᱢᱮᱱᱟᱜ ᱛᱟᱭᱟ ᱚᱲᱟᱜ ᱨᱮᱱ ᱮᱨᱟ ᱦᱚᱯᱚᱱ ᱠᱚᱣᱟᱜ᱾ ᱠᱤᱥᱟ.ᱲ ᱦᱚᱲᱟᱜ ᱨᱚᱲ ᱞᱟᱸᱫᱟ ᱫᱚ ᱥᱟᱱᱟᱢ ᱦᱚᱲ ᱜᱮ ᱠᱟ ᱠᱩᱥᱤᱭᱟᱜᱼᱟ, ᱢᱮᱱᱠᱟᱷᱟᱱ ᱟᱡ ᱫᱚ ᱨᱮᱸᱜᱮᱡ ᱦᱚᱲ ᱚᱠᱭ ᱦᱚ ᱩᱱᱤᱭᱟᱜ ᱢᱚᱱᱮ ᱨᱮᱱᱟᱜ ᱫᱩᱠᱷ ᱵᱮᱛᱷᱟ ᱠᱚ ᱵᱟᱝ ᱠᱚ ᱵᱩᱡᱷᱟᱣ ᱛᱟᱭᱟ᱾

 

ᱱᱟᱣᱟ ᱠᱚ ᱥᱟᱱᱟᱢᱟᱜ ᱧᱮᱞ ᱚᱱᱚᱬᱦᱤᱭᱟ. ᱟᱜ ᱢᱚᱱᱮ ᱨᱮ ᱱᱚᱣᱟ ᱠᱟᱛᱷᱟ ᱠᱚ ᱜᱷᱩᱨᱞᱟ.ᱣᱚᱜ-ᱟ ᱡᱮ, ᱵᱟᱱᱟ  ᱦᱚᱲᱟᱜ ᱦᱚᱲᱢᱚ ᱢᱟᱭᱟᱝ ᱦᱚ ᱢᱤᱫ ᱜᱮᱛᱟ ᱠᱤᱱᱟ. ,ᱵᱩᱡᱽ ᱟ.ᱠᱤᱞ ᱦᱚ ᱢᱤᱫ ᱜᱮᱛᱟ ᱠᱤᱱᱟ., ᱡᱤᱣᱤ ᱨᱮᱭᱟᱜ ᱨᱮᱸᱜᱮᱡ-ᱛᱮᱛᱟᱝ, ᱥᱤᱛᱩᱝ-ᱨᱟᱵᱟᱝ ᱦᱚ ᱢᱤᱫ ᱜᱮᱛᱟ ᱠᱤᱱᱟ., ᱠᱤᱥᱟ.ᱲ ᱨᱮᱦᱚ ᱨᱮᱸᱜᱮᱡ ᱦᱚ ᱢᱤᱫ ᱜᱮᱛᱟ ᱠᱤᱱᱟ ᱩᱯᱨᱩᱢ ᱾ ᱢᱮᱱ ᱠᱷᱟᱱ ᱵᱟᱱᱟ ᱦᱚᱲᱟᱜ ᱜᱮ ᱵᱷᱮᱜᱟᱨ ᱵᱷᱮᱜᱟᱨ ᱜᱩᱱ ᱢᱮᱱᱟᱜ ᱟᱠᱟᱫᱟ ᱛᱟ.ᱠᱤᱱᱟ᱾  ᱱᱚᱣᱟ ᱠᱟᱛᱷᱟ ᱵᱷᱟᱵᱱᱟ ᱠᱟᱛᱮᱜ ᱚᱱᱚᱬᱦᱤᱭᱟ. ᱜᱚᱢᱠᱮᱭ ᱢᱤᱫ ᱴᱟᱝ ᱠᱟᱛᱷᱟᱭ ᱟ.ᱭᱟᱠᱟ.ᱣ ᱟᱠᱟᱫᱟ ᱡᱮ ᱡᱚᱛᱷᱟᱛ ᱜᱮᱭᱟ ᱡᱟᱦᱟ ᱦᱚᱲ ᱠᱚ ᱢᱮᱱᱟ “ᱦᱳᱲᱳ ᱜᱮ ᱯᱮᱴᱮᱡ ᱯᱮᱴᱮᱡ ᱟᱱᱟ, ᱦᱚᱲ ᱫᱚ ᱵᱟᱵᱚ ᱯᱮᱴᱮᱡ ᱟᱱᱟ”᱾

 

ᱥᱩᱢᱩᱝ ᱠᱚᱨᱚᱢ ᱠᱚᱯᱟᱞ ᱨᱮᱭᱟᱜ ᱫᱳᱥ ᱛᱮ ᱱᱚᱝᱠᱟ ᱟ.ᱠᱤᱱ ᱛᱟᱞᱟ ᱨᱮ ᱵᱷᱮᱜᱮᱫ ᱥᱤᱨᱡᱟᱣ ᱟᱠᱟᱱᱟ᱾ ᱡᱩᱫᱤ ᱚᱱᱚᱬᱦᱤᱭᱟ. ᱜᱚᱢᱠᱮᱭᱟᱜ ᱵᱟᱲᱟᱭ ᱛᱟᱦᱮ ᱠᱚᱜ ᱛᱟᱭᱟ  ᱚᱠᱟ ᱞᱮᱠᱟᱛᱮ ᱱᱚᱣᱟ ᱠᱚᱨᱚᱢ ᱥᱚᱢᱟᱱ ᱜᱟᱱ ᱠᱚᱜ-ᱟ ᱛᱟᱦᱞᱟᱮᱭ ᱥᱚᱢᱟᱱ ᱠᱮ ᱜᱮᱭᱟ᱾ ᱪᱮᱫᱟᱜ ᱥᱮ ᱵᱟᱱᱟ ᱦᱚᱲᱟᱜ ᱛᱤ -ᱡᱟᱸᱜᱟ ᱦᱚ ᱢᱤᱫ ᱜᱮᱛᱟ ᱠᱤᱱᱟ. , ᱮᱱᱛᱮ ᱨᱮᱦᱚ ᱠᱚᱨᱚᱢ ᱠᱚᱯᱟᱞ ᱨᱮᱭᱟᱜ ᱵᱷᱮᱫ ᱞᱮᱠᱟᱛᱮ ᱢᱤᱫ ᱦᱚᱲ ᱫᱚ ᱠᱤᱥᱟ.ᱲ ᱟᱠᱟᱱᱟᱭ ᱟᱨ ᱢᱤᱫ ᱦᱚᱲ ᱫᱚ ᱨᱮᱸᱜᱮᱡ ᱾

 

 

ᱢᱩᱪᱟ.ᱫ ᱠᱟᱛᱷᱟ

ᱢᱟᱱᱟᱛᱟᱱ ᱚᱱᱚᱬᱦᱤᱭᱟ ᱰᱚᱢᱟᱱ ᱥᱟ.ᱦᱩ ᱥᱩᱢᱤᱨ ᱜᱟᱢᱠᱮᱭᱟᱜ ᱚᱞ  “ᱟᱢ ᱟᱨ ᱤᱧ” ᱚᱱᱚᱬᱦᱮ ᱨᱟᱭᱟᱜ ᱥᱟᱨ ᱠᱟᱛᱷᱟ ᱛᱮᱫ ᱫᱚ ᱠᱷᱟᱴᱚ ᱢᱟᱪᱷᱟᱛᱮ ᱱᱚᱝᱠᱟ ᱦᱚ ᱚᱞ ᱜᱟᱱᱚᱜ-ᱟ᱾

 

ᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼ

DOWNLOAD PDF: ONLY SANTALI VERSION IS AVAILABLE

ᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼᱼ